西貢搭棚玩瑜伽網民憂陳雅思失手就跌落水

【蘋果日報】馮盈盈係2016年港姐冠軍，早前喺《果欄中的江湖大嫂》飾演MK妹「小狼女」，入型入格，令其人氣急升。但同屆港姐季軍陳雅思（Bonnie）就似乎冇咁好彩，入行後工作量唔多，早前就幫《Do姐有問題》節目做旅遊主持，出外搜羅有趣題目。
雖然唔係成日有工開，但Bonnie仍好積極做運動，唔會虛度光陰。昨日Bonnie喺ig上載玩瑜伽相，但就唔係喺平地玩，而係喺沙灘上玩空中瑜伽，真係好新鮮。佢約埋幾個女性朋友一齊入西貢，今日閒日應該冇咁多人，佢哋就用咗幾支長竹搭棚，然後就放喺沙灘近岸位置，成個人懸吊喺半空。佢留言﹕「It was an amazing, full day yoga practice」
見Bonnie個樣初初有啲驚，習慣後就可以笑住擺甫士。不過，唔少網民就擔心安全設施係咪足夠，因為得條繩，萬一個架倒塌，就真係幾大件事，留言﹕「失手就跌落水。」但亦有人話玩呢種瑜伽時，地下通常會放張厚墊，但Bonnie就冇回覆有冇咁做喇。