108日激減63磅 44歲洪智敏大媽變美魔女

【蘋果日報】曾演出《On-Air》、《韓國小姐》等劇集嘅韓國44歲音樂劇演員洪智敏，近日因成功喺108日減咗63.8磅，而喺網上引起熱議。洪智敏於1996年出道，出道以嚟都係肥嘟嘟嘅身形，去年11月誕下第二胎後，身形完全走樣，令佢感到失落，甚至有網民笑稱佢係「大媽」，所以洪智敏亦扚起心肝，於年初現身綜藝節目時表示決心要減肥。
洪智敏喺幾個月內積極戒酒並控制卡路里，加上喺跑步機上以中速行30分鐘以上嘅運動，多管齊下，成功喺108日減咗29KG，佢日前喺Instagram公開減肥成果，將兩張着住同一件藍色露肩連身裙嘅相做對比，坦言只要有毅力就一定會減到，畀到唔少信心女性，更獲粉絲大讚靚咗好多。而洪智敏減肥後除咗體形嘅變化，其五官更變得立體，被網民稱係「整容級減肥術」。