【馮仁昭四圍超】Oscar氹江若琳　造人慶祝開店

【蘋果日報】江若琳同未婚夫蕭潤邦（Oscar）噚日喺深水埗出席麵館開幕，老闆娘江若琳一早到場招呼吳日言、王宗堯等好友，連李家鼎都有現身祝賀，新店開張有舞獅採青環節，當拉開蓋住店牌嘅紅紙時，Oscar輕吻江若琳一啖。店內當眼位置掛上嘅書法牌匾對江若琳意義重大，由現居廈門嘅爺爺為佢親手寫。
爺爺寫牌匾
講起揭幕一刻，江若琳話感動又開心，差啲喊出嚟，Oscar就話：「叫咗佢唔好喊，所以錫佢一啖，鼓勵吓佢。」至於店內書法牌匾，江若琳話：「爺爺眼又矇、手又震，都專登寫咗呢個牌匾，由爸爸專登去廈門拎返港。」問到新店股份點計，Oscar笑住望一望江若琳：「我同佢邊有分你我，希望半年內可以再開多一間麵館。」
江若琳透露開始搞婚禮，但未有打算今年生BB，Oscar插嘴：「今晚要好好慶祝下。」似暗示火速造人，江若琳即笑言：「吓！嚟緊結婚喇，畀我靚啲啦！」Oscar又指今次好似婚禮上集，因為有好多親友到賀。
撰文：馮仁昭