《西部世界》Dolores性格大逆轉驚喜處處估佢唔到

【蘋果日報】HBO劇集《西部世界》(Westworld)開播以來評價都唔錯，其中一個原因係佢承接返上一季嘅驚喜元素，多線發展之餘又交錯出人類同機械人嘅徵妙關係，尤其是今季Dolores嘅性格大逆轉，變得狠毒又充滿野心，令人無法預測佢下一步舉動，每每為觀眾帶來衝擊。去到第2同第3集，發展就更令人意想不到，以下就係兩集嘅終極劇透，唔想知劇情嘅而家快啲立即離開！
.
.
.
.
.
.
.
.
.
.
.
.
.
.
.
.
.
第2集劇情：
第2集其實充滿住眾人回憶同現在時空嘅穿插，一開始觀眾就見到Dolores著住時裝衫出現，佢進入真實人類世界，原來都係過去嘅回憶，係佢剛剛被創造，要成為展示科技成果嘅「人辦」，但佢已經被真實世界深深吸引住，埋下想闖入真實世界嘅願望，而劇中就再穿插現時佢同Teddy殺出樂園嘅情況。Dolores於第二集中利用智慧同掌控咗嘅科技，積極招兵買馬，打算完全佔領西部世界，雖然撞到另一名覺醒咗嘅頭目Maeve，但二人並無合作。
而當Dolores回憶過去時，佢同William嘅往事又再浮現於眼前，曾經於第一季共患難嘅二人，去到現實世界已變成兩回事，William已經結婚生仔，而自己呢？仍然係一個被用作娛賓嘅機械人，而二人嘅種種情義都隨風而逝，令Dolores更加深信只有獲得自由先可以掌握命運。
另外William一邊，一見到後生版嘅佢就知道係講緊回憶，故事講述佢同Logan初時接觸機械人嘅情景，從而引入佢哋於第一季中，進入樂園並改變一生嘅經歷。再一跳去到現實，佢又再次身處西部世界入面繼續發掘自己嘅「游戲」。
第3集劇情：
一開始故事背景就去咗「印度世界」，一對男女本來擦出愛火相當激情，點知遇著機械人叛變，連老虎都開始攻擊人類！不過呢個情節暫時就唔知同主線有咩關係。
鏡頭一轉，終於去到Bernard同Charlotte，上集講到二人於「大屠殺」事件後逃出生天，但Charlotte卻執意要搵一個機械人帶返現實世界，原來嗰個機械人就係Peter，亦即係樂園中Dolores嘅爸爸！不過輾轉之下，Peter同Bernard都被Dolores嘅手下捉咗，Dolores仲發現爸爸開始「hang機」語無倫次，於Bernard幫助下，發現Peter內裡原來有個更高層嘅人士想重寫Peter個程式，埋下更多陰謀伏線。
不過原來一睇外面，人類軍隊已殺到嚟，Dolores招兵買馬返嚟嘅士兵被打到落花流水，呢個時候，Dolores竟然落命令殺晒己方嘅士兵，原來一切都係佢利用機械人士兵達到自己目的，認真恐怖！
去到Maeve一方，其實都係繼續搵女，但就意外重遇女大盜Armistice，又撞返自己嘅人類「救命恩人」。一行人去到樂園嘅東部，開始愈行愈古怪，仲落起大雪。認真一睇，原來佢哋已闖入日本嘅「將軍世界」，仲有個日本武士手起刀落就劈埋嚟，而第3集亦去到呢度完結。
《西部世界》(Westworld)第二季，逢周一早上9時HBO（Now TV頻道110/115）與美國同步播出，同晚10時重溫，或播出後於HBO自選服務、Now隨身睇及HBO GO足本重溫。