簽王祖藍由零開始林欣彤戒鼻音喪練

【蘋果日報】【《蘋果》專訪】林欣彤（Mag）8年前參加《超級巨聲2》奪冠入行，風光過後因情緒病令事業停滯，去年簽王祖藍後重新出發，最近新歌《忍》在YouTube有逾110萬點擊，她形容音樂就是她的陽光，若有一天沒有了音樂，她說：「雖然可能未必會死，但我可能會黯淡無光，所以我好感激音樂！」
捐錢養流浪狗
再次由零開始的Mag坦言：「對於我依家嘅位置好滿意，因為我唔係好有野心，一直以嚟就算up and down，我仲出到歌，又養到屋企人，繼續捐到錢養流浪狗，已經好足夠。」
曾被網友批評唱歌鼻音重，Mag花了很多心血改善：「以前咬字真係唔好，就算依家都係有進步空間，我好羨慕容祖兒、林憶蓮咬字好好聽。以前成日捉錯處，睇番每條片都彈到一文不值，下次上台我又好驚，喺屋企不斷喪練。初初好多人叫小巨肺，但我唔想淨係唱類似《A.I.N.Y.》嘅歌，每樣嘢都有佢嘅難度。」
去年離開英皇和無綫後有傳搵公司遇困難？Mag說：「睇唔到大家怕咗我，可能以訛傳訛，可能我係一個負面嘅人，我學習緊點樣擁抱呢個特點，而唔係將佢變做會傷害自己嘅特質，學識有智慧地控制自己。」Mag坦言以前不懂表達，很多事都藏在心中：「依家想將自己完全展現喺大家面前，無論開心、唔開心、堅強、軟弱，我都想畀大家睇到。」
採訪：余燕儀、倩宜
攝影：陳慧安
髮型：Terry Yeung of hair corner