特首妹管晒渣打中港台

【明報專訊】特首曾蔭權一門多傑，細佬曾蔭培做過前警隊一哥，細妹曾璟璇喺商界表現傑出，昨日再上一層樓，獲委任渣打銀行（2888）香港董事局主席，接替周松崗。

曾璟璇1992年加入渣打，2005年升任為中國區總裁，2009年7月任大中華區主席，今次再上一層樓，新任命要處理香港、中國及台灣董事局主席工作。今次任命，同周松崗退任有關。

接替卸任的周松崗

身兼港鐵行政總裁嘅周松崗，由2004年起，出任渣打香港主席同獨立非執行董事。早前佢公布港鐵嘅合約今年底期滿，之後會退休。家佢退埋渣打嘅工作，都算係真正享受退休生活。

講番曾璟璇，佢今年53歲，仍然係單身貴族。佢喺渣打由人力資源工作做起，之後接任中國區業務後，開拓渣打喺內地嘅業務。好多內地媒體報道，話曾璟璇喺一位小女子，任內其中一項為人稱頌嘅功績，係佢半年內帶領渣打喺廣州、成都、蘇州開分行，工作能力唔輸蝕。

曾璟璇喺屋企排名最細，成就不比阿哥遜色。五個阿哥各有成就，大哥曾蔭權由推銷員到特首；二哥曾蔭培係前警隊一哥，家係新創建集團執行董事；三哥曾蔭煊喺加拿大開設科研公司，雷曼迷債事件中，佢太太都係事主，後來有報道指曾蔭煊太太提早獲得賠償，曾蔭煊發聲明指與兄長曾蔭權無關。四弟曾蔭藩在加拿大當大學教授，研究人類細胞染色體。五哥曾蔭荃居於加拿大，同曾蔭煊一齊搞科研。

報料電郵﹕piano@mingpao.com