南寧店手鐲現裂痕 謝瑞麟頭痕

【明報專訊】繼周生生（0116）嘅18k金手鏈被查出成色不足後，另一港資金飾店謝瑞麟（0417）嘅18k金產品亦都喺內地遇上麻煩事，不過就唔係畀中央部門查到有問題，而係顧客嘅投訴被內地傳媒大篇幅報道，睇嚟謝瑞麟今次事件之後，都要做番好形象工程啦。

內地媒體《當代生活報》噚日報道，有顧客去年11月喺南寧謝瑞麟專櫃，買咗條1890元人民幣嘅18K金手鐲，畀4歲嘅兒子戴，點知只係戴咗3日已經出現3條裂痕，顧客本來要求謝瑞麟維修手鐲，但係謝瑞麟話手鐲嘅工藝特殊，兼且無得整，只可換其他同價貨品。但事件擾攘成2個月，那位顧客家就要求謝瑞麟退貨。

擾攘兩個月 考慮賠錢了事

小琴問過謝瑞麟發言人，佢話產品出廠嘅時候係無問題，師傅睇過條手鐲，認為係因為「外來因素」而形成裂痕，唔關品質事，又話賣嘅時候已經有適當嘅指引畀客人，點樣保養產品，所以唔可以退貨。不過佢又話仲同個客傾緊，如果個客堅持要退貨，佢哋會內部再傾喎。