【馮仁昭四圍超】探訪獨居長者應采兒帶囝囝派米

【蘋果日報】陳小春上年帶4歲大囝囝Jasper參加內地綜藝節目《爸爸去哪兒》第五季，Jasper精靈可愛，唔少觀眾都鍾意佢，仲有廣告商打Jasper主意。不過作為媽咪嘅應采兒，只係想囝囝保持善良嘅心，明白幸福唔係必然，前日佢就帶Jasper去深水埗探訪獨居老人，仲要囝囝親手派米同即場表演跳舞，氹老人家開心。
表演跳舞
問到點解會帶囝囝去派米？應采兒話：「帶個仔去深水埗探訪獨居長者，一方面係幫長者check吓平安鐘有冇壞，另方面係想Jasper感受吓幸福非必然，要小朋友明白仲有好多人生活好困難，Jasper陪老人家傾吓偈之餘，又表演跳舞，氹到啲公公婆婆笑得好開心。我要個仔知道，要識得回饋個社會，睇到佢自己係好開心去做呢啲嘢，好自發性拎啲米畀婆婆。」
內地網民知道Jasper咁乖仔，都大讚佢：「和媽媽一起去做好事，真乖！正能量，善良的一家人！」、「真的是好孩子！好事就要從小做起！」、「家教太好了，怪不得Jasper這麼懂事！」、「一家人都好善良啊！」
撰文：馮仁昭