吳啟明爆同黎明打邊爐大家都無錢埋單

【蘋果日報】下月就54歲嘅吳啟明，消失娛樂圈多年，同圈中人幾近冇聯絡，一度就連細佬吳啟華都話搵唔到佢。不過，當年佢活躍娛樂圈，其中一位好友同佢一樣，都叫阿明，佢就係黎天王黎明（Leon）喇！
吳啟明參加87年藝員訓練班入行，而Leon就參加86年新秀歌唱比賽後加入無綫，吳啟明同Leon結緣係因為拍劇，仲答應Leon邀請拍攝Leon嘅91年音樂特輯《我的感覺》，加埋另外兩位老友林俊賢同歐陽震華一齊話當年，其間吳啟明就爆咗佢同Leon嘅一件瘀事，就係食完冇錢埋單。
吳啟明話：「我哋兩個一齊去食火鍋，叫咗好多嘢，點知原來你又以為我有錢，我又以為佢有錢，原來大家都冇錢，埋單問幾錢先知！」Leon仲補充，記得嗰張單係200幾蚊，吳啟明就笑住話：「黎明未紅原來都幾慘㗎！」