【馮仁昭四圍超】溫碧霞90年代腔揀唱百強王菲歌

【蘋果日報】溫碧霞（Irene）將於下月19日喺麥花臣場館舉行「溫碧霞海潮演唱會2018」，噚日佢喺深水埗舉行記者會，又同觀眾玩遊戲兼送門票。講到選曲，佢話到時會唱陳百強、王菲等8、90年代嘅經典歌，仲話會選唱難度高嘅歌曲挑戰自己，佢話：「我會懷念一啲歌手，同埋我細個鍾意嘅偶像，好似陳百強啲歌，其他就係我唱過或拍過嘅電影歌曲。」佢又透露舞台設計會以花同海為主，而且會邀請一男一女歌手做表演嘉賓，對方同自己曾有淵源，或者同自己合作過。
老公撐性感
依家積極籌備練歌嘅Irene話練歌練到瘦咗，體重仲回復二十年前嘅102磅，至於歌衫亦襯番以前海潮嘅角色。問到會唔會好性感，佢話：「舞台主題係海同花，所以啲衫都會配合番，好靚同飄逸，都有啲型格。」佢仲話老公唔會介意自己性感，認為性感係一種美感，女人會自己散發出嚟。雖然冇喺香港演唱一段時間，Irene話唔會緊張，反而係好享受。
撰文：馮仁昭