【馮仁昭四圍超】梁芷珊偕男友外遊回春

【蘋果日報】才女梁芷珊舊年同商人羅傑承，結束15年婚姻，當時兩人聲稱分開唔涉及第三者，主要原因係性格不合，之後有傳梁芷珊離婚前，曾經努力挽救婚姻，可惜無功而回。回復單身後，梁芷珊就同孫佳君嘅舊愛、法籍三星米芝蓮廚師男友Olivier拍拖。再有新戀情，梁芷珊一直高調認愛，前日佢喺Ig晒同男友嘅合照，雖然男友Olivier唔見樣，只係得個背脊做「影後」，不過見梁芷珊露出甜到漏嘅笑容，唔使講都感覺到，呢段戀情令佢相當開心。
獲讚變番靚
至於二人去咗邊，原來佢同男友Olivier蜜遊台北，相中見到佢哋身在饒河夜市旁邊嘅松山慈佑宮留影。除咗喺旅遊景點「打卡」之外，梁芷珊食日本菜時，見到最愛嘅海膽，即「相機先食」，甚至喺網上留言，打出兩個心形符號，心情唔錯，睇嚟玩得好開心，朋友見到梁芷珊蜜運中，紛紛都留言讚佢容光煥發兼且笑得好甜，仲話佢：「變回以前那樣漂亮。」
撰文：馮仁昭