祖兒師兄貼到實賀Wyman

【蘋果日報】填詞人黃偉文（Wyman）昨日49歲生日，前晚跟一班圈中好友，舉行「珠片之夜」慶祝生日，Wyman昨日在Ig貼相兼留言：「七七四十九歲！珠片之夜！多謝大家！」照片中見到聲稱已經分手的容祖兒跟劉浩龍（師兄）同場，更貼身站在一起合照。
前晚約有20多名嘉賓出席，當中包括Wyman醫生密友吳偉民、吳君如、薛凱琪及鄭欣宜等，各人都配合主題着到閃亮登場。早前宣佈5年情玩完的祖兒及師兄亦有同場，大合照時，站在壽星公旁邊的祖兒明顯傾向另一邊，似有意無意貼向師兄。前晚祖兒在派對滿場飛，除大合照外，還有一張嘟嘴作狀錫壽星公Wyman的相。而祖兒因為簽證過期，無法去美國出席好姊妹阿嬌鍾欣潼婚禮而要留港。祖兒跟師兄的關係撲朔迷離，上月師兄麥花臣開騷，祖兒亦大方撐場。
撰文：李森