有煤氣App 開飯冇難度

【明報專訊】小琴晚晚喺公司飯堂食飯，冇乜機會食住家飯，但放假都想一展廚藝。煤氣（0003）推出個iPhone App，大家睇到有咩啱食，跟住嚟買材料、煮餸，仲有真人示範片段。近期物價飛漲，如果煤氣幫手格價，教埋大家去邊度買餸又平又抵，就更加方便。

App裏面個「精選食譜」好吸引，有過千款食譜，按材料、煮法、中、西餐同難度區分。噚日係舊曆十二月初八，係臘八節，傳統要祭祖，祈求豐收、吉祥，仲有應節嘅臘八粥。不過，家冇乜人知道點煮臘八粥，小琴睇到煤氣App，有臘八粥嘅食譜，用糯米、冰糖、花生、栗子、紅豆、紅棗、元肉、蓮子、糖冬瓜同百合，煲一個鐘就食得。睇到個食譜都覺得滋味，啱哂咁乾燥嘅天氣。未有iPhone喺手，去煤氣烹飪中心嘅網站，都有齊呢啲食譜。

每日食譜 短訊通知材料

呢個iPhone App另一方便之處，就係可以選定每日食譜，每日有齊一款湯、主菜、甜品，煤氣會用短訊通知你食物材料。除咗食譜，仲有插畫家馬仔筆下嘅主角，一齊玩烹飪遊戲。

家選用呢個App，煤氣提供消費優惠，用戶去Towngas Avenue食飯，惠顧一道主菜，就可以免費食頭盤、餐湯或甜品，仲加送一杯熱飲，優惠期截至2月13日。

報料電郵﹕piano@mingpao.com