花旗喺港大開班 學生爭崩頭

【明報專訊】莘莘學子喺讀書時，已經為自己嘅未來鋪路。花旗銀行今年同香港大學合辦嘅關於銀行界嘅課程，唔計學分都吸引成百個學生報名，仲要筆試面試後，先取錄其中46個學生。點解要爭崩頭咁吸引？之唔係因為完成課程後最高分嘅4位同學，可以入花旗實習囉。

今年係課程踏入第7個年頭，花旗亦由之前3年嘅中文大學，返番去同港大合作，只有港大嘅經濟及工商管理學院二年級同埋三年級嘅本科生，先有機會上呢個課程。花旗除咗金錢上贊助之外，亦會出動花旗裏面嘅大人物親自教授，花旗集團香港區資本市場及企業銀行業務總裁麥永森、花旗香港環球個人銀行服務副總經理周永贊、環球個人銀行服務投資策略及研究部主管張敏華等等，都會親自上場，教返佢哋各自最掂嗰瓣，花旗真係名副其實出錢又出力。