金寶湯孖太古 進軍飲湯大國

【明報專訊】中國人鍾意飲住家湯就唔使多講啦，就連太古（0019）同金寶湯都看準呢個龐大的住家湯市場，啱啱喺上海成立合資公司，諗住分一杯羹。佢哋話，中國係全球湯品人均飲用量最高嘅國家之一，每年飲用多達3550億碗湯，人均一年飲湯量為273碗，仲要差唔多全部都係住家湯自己煲，都咪話唔嘢少。

中國人飲湯 幾乎全部自家煲

其實，金寶湯早喺2007年已經進軍中國市場喺廣東省開業，太古一直都係幫佢哋做產品分銷，太古主席白紀圖雖然係「鬼佬」，但佢都話住家湯水係中國人飲食文化中不可或缺嘅一環，佢仲用商業眼光分析：「如果將佢商業化，潛力應該相當驚人！」今次呢間合資公司，佢哋太古佔四成股權，金寶湯就佔六成。

今次金寶湯咁雄心勃勃，小琴都好好奇佢哋會唔會鑽研一啲富中國特色嘅地道住家罐頭湯，好似青紅蘿蔔煲豬骨、西洋菜湯、豬肺湯咁，呢方面，金寶湯當然係無透露啦，佢地今次搶唔搶到啲阿媽市場，真係要拭目以待喇。

報料電郵﹕piano@mingpao.com