深發行改名難「平安」

【明報專訊】平安保險（2318）旗下嘅平安銀行及深圳發展銀行去年9月敲定整合方案，雖然目前仍然等待內地監管部門審批，但可以預期呢段幾經波折嘅「平深戀」好大機會喺今年內修成正果。而市場亦都開始揣測，「平深戀」嘅愛情結晶（即平安及深發行整合後的銀行）將來姓甚名誰。

小琴收到風，深發行嗰邊已經積極就命名問題進行研究。原本以為，平深整合後嘅銀行，最有可能名為「中國平安」，以突出其全國性嘅業務發展定位。不過，有熟悉內地市場人士同小琴講，內地企業要喺名字前面冠以「中國」二字有難度，一般只有央企先可以做得到。

據聞，身為民企嘅平保當年可以命名為中國平安保險，除咗因為佢本身名副其實係全國性企業之外，更重要嘅，係因為佢嘅始創股東，有工商銀行（1398）及招商局兩大國企份。

雖然未必可以取名為「中國平安」，但據了解，個新名仍然會同平安及深發行嘅品牌發展概念一致，有內地網民就花心思幫平深改名，呼聲比較高嘅係「平深安展」。