上海姑爺灑千萬翻新愛巢

【明報專訊】瑞安建業（0983）主席、「上海姑爺」羅康瑞2008年11月同「最美麗港姐」朱玲玲拉埋天窗後，兩人入住羅康瑞位於淺水灣道36號嘅一號大屋。羅主席前年決定用800萬元整靚同擴大呢個愛巢。地政總署最新公布，間屋要補地價262萬元。換言之呢鋪大裝修使成千幾萬，當然對姑爺嚟講濕濕碎。

有好友同小琴講，間屋亦用咗靚石包住外牆，但面積唔多（大約只有40方呎）。不過，間大屋裝修完後，地積覆蓋率增加咗30％，所以要補地價。

補地價達262萬

羅康瑞不惜斥巨資，實行畀新女主人朱玲玲住得舒舒服服。同時亦都「肥水不流別人田」，羅康瑞2009年簽協議裝修自己間大屋，單工程合約都選擇益吓自己間上市公司嘅股東，故此已將工程判畀瑞安建業。工程包括改動同加建，即係話，只係裝修翻新而非重建，工程期約3個月。

據資料顯示，淺水灣道36號呢個地址共建有5幢大屋，而羅康瑞住喺1號屋，亦係最大嘅一間。數月前，恒隆地產（0101）董事長陳啟宗堂弟陳仰宗以2.5億元售出淺水灣道36號，持貨12年，勁賺2.12億元，而新買家係海外註冊公司。至於羅康瑞間1號屋，比5號屋大好多，地產界朋友估計最少值5億至6億元。