成思危著作 英文版升價十倍

【明報專訊】中國經濟舉足輕重，好多外國大學都開辦中國經濟課程，認識多啲中國國情。不過，講中國經濟嘅英文教科書，好多都由外國人執筆。天窗文化集團旗下嘅天窗專業出版社，就將中國學者嘅著作翻譯成英文版銷售，畀外國人接觸到真正嘅中國作品。

下周登港 成教授親臨發布會

佢哋最近跟全國人大常委會原副委員長、國際金融論壇（北京）主席成思危教授合作，出版佢嘅著作《中國經濟改革與發展研究》（Economic Reforms and Development in China），成教授下周一會來港出席發布會。內地殿堂級人物嘅著作，點解會搵香港出版社協作呢？天窗專業行政總裁李偉榮話，內地出版社較少出版英文書，未必熟悉外國人嘅口味、外國銷售渠道等，香港喺呢方面經驗較多，可以整合內容，配合推廣。成教授嘅呢本作品，天窗就同專出教科書嘅麥格羅．希爾國際股份有限公司（McGraw-Hill ）合作，由專人翻譯，所以售價較貴，一書四冊，每冊要130元美金，折合約1014港元。中文版就平啲，88元人民幣，大約要103港元。