Webb：工行供股嘥股東錢

【明報專訊】去年底，小琴打爛個豬仔錢罌，攞啲錢嚟應付3間中資銀行供股。點知股壇「長毛」David Webb噚日話，工行（1398）呢趟供股得啖笑，嘥錢兼嘥時間。何出此言？佢話供股集資筆錢，仲少過2009年度嘅派息，如果真係要增加資本比率，就索性取消2009年、2010年嘅派息。

唔派息已可應付資本要求

Webb指出，呢次供股集資449.48億元（人民幣•下同），但2009年度所派嘅股息有567.83億元。Webb話如果工行真係想改善資本，可以減少派息，甚至唔派息。但呢次供股要花2.4億元，派股息時，股民又要交稅畀政府，一來一回，睇嚟股民最唔抵。唯一安慰嘅係，工行熟習成個供股過程，日後要再行供股時，就會駕輕就熟。小琴睇完呢篇文，真係希望Webb下次早啲發出溫馨提示。