新聞類別
財經
詳情#
【明報專訊】靚女梗係着數啲，傳媒都唔例外，有外表又有內涵嘅，出路自然多啲。小琴聽聞，渣打（2888）想喺窩輪市場大展拳腳，咁樣，自必然要搵個有號召力，兼有吸引力嘅猛人加盟，據聞渣打當前正積極游說now財經台首席主播林燕玲過檔渣打，希望幫佢哋喺競爭劇烈嘅輪場，殺出條血路。
趙海珠葉文炘 落戶法巴大和
話時話，近年好多券商都鍾意搵主播加盟幫手，好似花旗搵咗有線前財經主播張敏華，加盟研究部，年前法巴搵咗當時炙手可熱的無綫主播趙海珠去協力賣輪，早排大和又挖咗now另一主播葉文炘，一樣係幫手賣輪，家陣連now嘅台柱級主播，外號「小飛俠」嘅林燕玲，都畀人游說去賣輪，一眼睇清，證券業真係興旺過傳媒業N倍。
講開又講，林燕玲係無綫出道，一出鏡，只要Zoom個大頭，全港觀眾都眼前一亮，而且報道新聞質素佳，聲線台型都出色，其後轉去now財經台，頓時成為台柱。
Talk得有外形 深受券商歡迎
畢竟小琴都係傳媒人，深知培訓一位好嘅記者，好嘅主播，需時甚久，家陣咁多好嘅人才流失去咗證券業，對傳媒行業嚟講，肯定唔係件好事，睇嚟各大傳媒老闆都要正視人才嚴重流失嘅問題，否則條路會愈走愈艱難。
報料電郵﹕piano@mingpao.com
回應 (0)
