里昂兔年風水 批埋金正恩運程

【明報專訊】里昂搞風水指數都搞咗好多年，試過停辦幾年，2009年又復出，喺嚟緊嘅兔年，里昂繼續會為大市占卜，鐵定明天公布，仲話明要為北韓下任領導人金正恩、港產政壇名人田北俊、美利堅聯儲局主席伯南克等等，預測兔年運程。

話時話，唔好話小琴衰，鍾意比較往績。里昂預測虎年都算幾準，佢上年年初預測，恒指喺虎年，頂多升至26000點，而虎年恒指至今，最威都只係升到去接近25000點水平，睇嚟里昂估虎年股市都算唔錯，之不過，里昂喺前年牛年作出嘅預測又準唔準呢？佢話2009年6月至8月係全年最差嘅時間，仲話恒指分分鐘可以插落去10600點的低水平，結果事實係恒指當年嘅6月至8月，由萬七點一路升去20000點，氣勢相當好，反而2009年低點喺3月創出，所以里昂牛年預測就唔算理想啦，幸好喺虎年已有明顯改善，希望佢喺兔年有更好嘅表現。