「毒」蘋果輪 散戶中招

【明報專訊】小琴細細個就知道「日日食蘋果，醫生遠離我。」當然，食真蘋果有益健康，之不過，散戶揀中食正「蘋果」窩輪（10033）， 就未必身心好。幾日前，德銀破天荒喺香港推出美股蘋果電腦的Call輪，讓萬千香江輪民可以按7倍嘅有效槓桿，投機世界第二大市值嘅股份，都算有新意。

可惜推出嘅時間，就認真唔利輪民，首先只得Call輪，冇得Put，同埋推出咗3日，即爆出蘋果一哥喬布斯（Steve Jobs）請病假，兼且前日爆出此不幸消息之時，美股又休市，結果隻10033，昨早一開市，便全面反映呢嗰不利嘅消息，喺7倍槓桿嘅效應下，殺傷力異常，一插就插咗27.8％。之前3天累積不足一成的升幅，全部蒸發，仲要跌突。

受累喬布斯請病假

小琴聽聞有啲輪民唔多服，認為蘋果前日美國停牌，又到噚晚喺美國時段才復牌，無理由噚日香港隻10033唔停牌，照樣畀佢trade。

之不過，有人唔同意，事緣蘋果前晚喺美國唔係停牌，而只係因為美國休假，停止買賣所致，蘋果才停牌，唔係佢本身想停牌，呢類情况真係好普通，例如香港股市農曆新年休市，匯控（0005）就照樣係美國英國買賣。

不過有輪商人士認為，窩輪唔係期貨，照計窩輪只跟正股及引伸波幅變化才郁，若然美國蘋果都停咗牌，冇理由10033只跟德股嘅蘋果預託證券，便跌得咁金，小琴係啲點暫時都未想通，但係輪民係10033輸鑊金，至今就係鐵一般嘅現實。

報料電郵﹕piano@mingpao.com