新浪微博傳美國上市

【明報專訊】近排科網股消息多籮籮，最近內地有報章報道，指風行內地嘅社交平台新浪微博，獲內地搜尋器一哥百度、同阿里巴巴集團相中，準備用1億美元入股，仲打算遠走美利堅分拆上市。

呢單消息雖然唔知有幾真，但係都幾有威力，連阿里巴巴集團個仔，即係喺香港上市的阿里巴巴（1688）昨天在香港也彈升了6％。

不過，新浪副總裁、微博事業部總經理彭少彬斬釘截鐵咁否認，仲話從未聽過阿里巴巴、同百度入股新浪微博，消息純屬謠言咁話喎。

但空穴來風，事出必有因。據內地消息稱，新浪管理層喺舊年年中，已開始考慮將微博獨立分拆上市，除咗成立新公司「微夢創科網路技術(中國)」單獨營運之外，喺上年10月召開嘅新浪微博開發大會上，仲宣布啓用網站域名weibo.com，雖然管理層耍手擰頭話同分拆上市無關係，但已經引起業內諸多猜測。