里昂批今年港股：上半年牛皮 下半年「兔仔跳」

【明報專訊】一年一度嘅里昂風水指數又嚟喇！唔講唔知，原來嚟緊係「金兔年」，聽落相當好意頭，而里昂「周居士」周子諾（其實佢正職係睇交通同基建嘅分析員）睇兔年恒指整體上升，但會比虎年更波動，預計上半年表現相對牛皮，下半年就會施展「兔仔跳」喎！

去年預測 首三季準末季錯

正所謂「風水佬呃你十年八年」，里昂風水指數就可年年同佢計數，睇返佢哋虎年預測，頭3季都測得幾準，唯獨第四季尤其係西曆11月初，里昂睇升但結果個市係跌。

查實里昂呢個風水指數已經玩咗十幾年，今年佢哋有新花臣，整咗個「板塊風水指南」，話今年利金利水不利土，所以睇好航運、造船、旅遊同賭股，但就睇淡地產同建築股嘞！

作為一個根正苗紅嘅港女，小琴最關注嘅，始終都係「樓」！里昂地產風水指南就話，位處「北中南方」同「東中西方」（唔好問小琴即係咩）嘅物業樓價可能會大跌，正宗「晦地」甚至包括豪宅區南灣、跑馬地同禮頓山，而旺地就有西環、天水圍、大美督同烏溪沙。

利金水不利土 睇淡地產股

不過，報告都提醒各位業主，就算有物業喺「晦地」都唔好鬧住，因為都有不少方法化解，例如整翻啲風水擺設，可自求多福咁話。

除咗講股同講樓，風水指數仲會同啲名人批吓命，果位決定狂印美鈔連累港人血汗錢不斷貶值嘅伯南克，「周居士」話佢肖蛇而五行屬水，即係一條「水蛇」，而水蛇係相信直覺、多疑而精明，仲話屬蛇嘅金融大師都係「會用煙霧和鏡子的魔術師」，聽完都唔知里昂係褒定貶伯南克。可以肯定嘅就係，里昂話呢條水蛇今年會迎接艱難嘅一年，而劫數多來自東方，唔通係講緊中美就人民幣匯率方面嘅角力？

報料電郵﹕piano@mingpao.com