機管局Fax蝦碌 記者會無人知

【明報專訊】近日房屋議題不停講，清拆菜園村續有風波，本報又踢爆麗新樓盤翠峰28，竟有高層先買後撻訂，運輸及房屋局長鄭汝樺當然理應畀傳媒追到瘦啦，但佢噚日現身機管局記者會，卻罕有地幾乎無記者到場，搞到佢要對住一大排空櫈自我演講，點解會咁？之唔係機管局個Fax系統壞咗，公關又唔知，仲好腦定以為已經向各大傳媒廣發通知。

呢一次蝦碌，作為機管局公關阿頭嘅前新聞之花魏綺珊會唔會畀人問責，小琴就仲未收到風，只係知道佢地噚日突然發現，原來全港新聞機構都收唔到佢哋嘅傳真通知，唯有急急call咗兩間電子傳媒，充撐吓場面，唔使等佢哋老細機管局主席張建東，同埋鄭汝樺咁無癮。

經此一事，小琴終於明白，點解時至今日有傳真又有電郵，但係各大公關公司仍然要堅持叫啲新入行嘅小妹妹，夜晚11點幾打電話去各大傳媒機構，「提醒」佢哋第二日有記者會，原來，科技有時真係無人咁靠得住㗎！