陳啟宗：唔留遺產就唔出事

【明報專訊】呢幾日，新聞都離唔開賭王家族大爭鬥，畢竟事件峰迴路轉又曲折離奇，隨時可以開拍幾十集連續劇呀。不過話時話，呢排又真係好多爭產事件發生，小琴啲同事都忙得不可開交，正所謂「家和萬事興，家衰口不停」，小琴不禁諗，香港嘅富豪點先可以避免後人爭產呢？

噚日恒隆系發表業績，恒隆系主席陳啟宗都係香港富豪，業績會之後自然被媒體追問對賭王件事有咩睇法啦，佢就話唔評論人哋嘅家事，至於佢自己點樣避免身家被爭奪？佢就淡淡然咁表示：「如果唔想見到爭產局面出現，最好就唔好留下財產畀仔女啦，唔留咪唔會出事囉」。佢又講笑咁話，其父親亦未有留低遺產畀佢。

其實好多外國嘅富豪，都傾向死後盡捐身家，一來可以做善事，二來可以避免仔女爭家產，又可以令仔女唔使做二世祖，其實香港嘅富豪都可以考慮吓。