兩熱爆新聞 記招頻取消

【明報專訊】呢排香港具話題性嘅新聞真係多蘿蘿，豪門爭產、電視王國股權易手成為全城茶餘飯後嘅熱話，發展情節峰迴路轉，仲精彩過啲電視劇，之但係市民追睇「續集」嘅同時，一班傳媒亦為咗追蹤更多第一手資訊而甚為頻撲。本來報道新聞乃傳媒嘅職責，並唔值得掛喺口邊，之但係，近日一眾新聞主角頻頻取消記者會，教記者們東奔西撲得個吉，就確實係浪費人力物力。

就以噚日短短一日為例，小琴晨早收到風，「殼王」陳國強會喺早上10點半就收購電視廣播（0511）股權一事會見傳媒，但當小琴去到現場時，就只見「殼王」派出德祥（0372）副主席周美華出嚟解畫。之後，又有消息話陳國強下午會接受傳媒採訪，大批記者聞風去到陳國強中環辦公室，結果苦候接近2小時仍不得要領。

高國峻記者會 公關：無嘢講

那邊廂，賭王何鴻燊家族就賭業王國嘅爭奪戰每日都有戲劇性嘅新發展。話說最初爆出爭產風波賭王嘅代表律師高國峻，原先話中午12點召開記者會，咁各大傳媒當然唔會放過呢機會，依時到達高國峻位於中環聖佐治大廈嘅辦公室樓下，點知卻遭到大廈保安驅趕，記者們無得交差，自然要問個究竟，結果只得到公關「高生無嘢講」作回應。其實，高國峻「放飛機」早有前科，據聞佢本月初已經想向傳媒爆料，曾主動聯絡某些傳媒提供獨家訪問的機會，惟每每都臨時取消訪問。

另外，爭產風波發展至今，賭王長房至三房均已分別向傳媒發出聲明或開腔，唯獨四房仍按兵不動，小琴噚日下午約3時收到消息，話四太梁安琪會於下午4點幾喺澳門濠璟酒店召開記者會，本港各大傳媒亦不惜過大海赴會，但最終無功而還。

報料電郵﹕piano@mingpao.com