宏利40人專責拆信

【明報專訊】宏利（0945）除咗賣保險，仲有強積金業務。每日收到嘅信件有過萬封，包括：強積金申報表、保險單等，拆信都有排拆。宏利特別安排一組同事處理呢啲書信，噚日小琴就去咗參觀工作流程。

工作組有40名員工，辦公室守衛森嚴，因為有好多客戶嘅個人資料，非工作組人員唔可以隨便入去。小琴參觀之前，小組都作出特別安排，唔畀我哋睇到啲資料。根據工作流程，有一組人專拆信、分類，另一組就按分類，掃描信件存入中央檔案，方便其他員工就跟進，例如：有顧客打去熱線查詢，宏利收唔收到佢嘅文件，接聽同事就可以喺電腦查到文件資料。負責人話文件正本會存倉七年。

唔好以為拆信、分類好容易，其實員工開工要打醒十二分精神。負責人話，試過有位老闆寄張支票嚟交強積金供款，點知寄咗張支票彩色影印本，員工要通知番呢位失魂老闆，問佢攞番張支票。