渣打利市封 搵球星撐場

【明報專訊】臨近農曆新年，唔少私人機構、銀行都會送啲利市封畀客戶，小琴亦係呢段期間收唔少利市封。設計利市封一啲都唔簡單，皆因又要有新意，又要有宣傳之效，都要考慮好多嘢。好似今年係兔年，好多機構都會用兔仔做主題，而最多人會選用嘅銀行利市封，設計亦都好特別。

好似渣打銀行就出咗兩款利市封，一款係同渣打有合作開嘅迪士尼出嘅，上面有米奇老鼠個樣同寫住「五福臨門」，而另一款就印有英超球隊利物浦4名球星。有留意開足球比賽嘅朋友，都應該知道今年渣打有贊助英超球隊利物浦，利物浦嘅球衫就大大隻字寫住「Standard Chartered」。不過，今季利物浦就打得麻麻哋，家排喺聯賽第7位，距離爭標都好遙遠，正所謂「物盡其用」，渣打都唔執輸，借埋利物浦球星謝拉特、「王子」托利斯等人，放喺自己個利市封上面，寫住「大吉大利」，襯晒「利」物浦。