【姐匙Talk】添福摸矮仔大髀抽水

【蘋果日報】娛樂圈一向捧新人最難，不過最近有新節目，成功捧紅咗班囝囝，仲搞咗兩隊男子組合出嚟。咪以為囝囝淨係受女士們歡迎，原來男士亦一樣好冧呢班囝囝，有人仲熱情到又攬又摸啲囝囝。
之前有電視台搞咗個節目選偶像，搵咗大班導師去教班囝囝聲色藝之外，仲教佢哋唱歌、跳舞，甚至喺娛樂圈嘅生存之道。姐匙聽聞其中一位導師「添福」對班囝囝好到不得了，直情當班囝囝係自己親生仔咁，到底好到點，真係估佢唔到。
自費跟出跟入
其中一次係呢班囝囝要出埠拍嘢，添福就跟埋班囝囝去拍嘢，仲要係自己畀錢買機票喎。後來有次喺活動，安排被叮咗出局嘅囝囝，加埋入到圍嘅囝囝同fans見吓面，竟然唔關事嘅添福，都見到佢嘅蹤影。
姐匙仲聽聞添福對其中一個囝囝「矮仔」好熱情，而佢嘅熱情程度係誇張得令人側目，事關添福唔單止成個身挨住矮仔，甚至有意無意咁掃到矮仔大髀，在場唔少工作人員都見到呢個情況，亦都議論紛紛覺得添福有抽水成份。喺添福行開之後，有工作人員忍唔住行埋去問矮仔，點解唔當場say no，拒絕添福摸大髀，矮仔就好無奈咁同工作人員講：「佢係導師，我可以點做呢？」
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。
撰文：Jessie
本欄逢周五刊登
長青網 - 一站式長者及護老者生活資訊網站