【娛樂人物】何遠東肥仔出頭天

【蘋果日報】演藝出身的何遠東在08年放下舞台劇演員的身份，加入無綫由零開始，去年何遠東遇到劇集《心理追兇》及《降魔的》兩個好角色，劇集推出後，獲得網民一致的讚賞，今年他更有機會登上大銀幕，入行十年事業有曙光，難怪何遠東說：「我相信肥仔都有出頭天！」
撰文：卓寶花
攝影：林賓尼
[今年是何遠東入行十周年，日前他在鰂魚涌接受訪問，回顧這段演藝生涯，他說：「嗰時啱啱入行，我第一套劇連推門入嚟講句對白都錯，你唔會知推門要等轉第幾號機，又唔會知道具點擺先拍到，嗰段時間係最辛酸，乜都唔識畀人鬧，我永遠都會講對唔住，我真係唔識，之後身邊有好多天使教識我好多嘢！」
去年在機緣巧合下，何遠東遇上《降魔的》龍貓這個角色，結果獲網民激讚之餘，亦獲得提名台慶頒獎禮最佳男配角，他說：「我相信肥仔有出頭天，我記得入演藝時要作文，嗰陣我已經寫我要做好綠葉、甘草演員，十幾歲就寫呢啲，倒轉頭睇主角真係未必到你，冇配角又唔會有主角，你問我，我做到六十幾歲都會做，當然喇，有人大膽搵我做主角，我都一定做，我等緊呢一日出現。」
榮幸獲邀拍打戲
談到今次在《葉問外傳：張天志》的演出，何遠東笑說：「有晚有人打嚟話八爺有套戲想搵我演，唔知我個期得唔得，我真係消化唔到呢個消息，嗰吓好震撼，忐忑咗一晚。」其後與八爺見面時，他說：「佢好快就問我你打好唔好？我話好。拍八爺電影有得打係榮幸，我喺演藝有學過基本功，點碌落地下，點跌唔受傷，一路袋住喺身。八爺指導下，將我嘅不可能完全擺晒出嚟，我成世人未打過交，拍完就知打交感覺，知道乜嘢係功夫電影。」
長青網 - 一站式長者及護老者生活資訊網站