【姐匙Talk】皇帝仔老竇撐腰同大命開拖

【蘋果日報】星二代「皇帝仔」雖然入行十幾年，但佢無論拍電影定係返內地拍劇，發展依然平平；反而近年去公仔箱搵食，撞啱鬧小生荒，皇帝仔就咁多咗機會。
早前皇帝仔有機會擔正做主角，姐匙聽幕後人員講，佢好怕畀人話靠老竇上位，加上性格cool cool哋，唔使埋位時，皇帝仔多數自己匿埋睇劇本，反而好少同人打交道。不過皇帝仔啲戲好唔好就見仁見智，有次佢同一位前輩「大命」同場演對手戲，大命似乎唔係好受皇帝仔嘅演繹方式，諗住指導吓啲後輩，點知皇帝仔完全聽唔入耳，覺得自己嘅演技冇問題，堅持唔肯拍多個take，兩個人喺片場拗到面紅耳熱，同場演員同幕後人員都驚咗，企埋一邊唔敢出聲。
高層唔敢插手
皇帝仔同大命實際上有唔少對手戲，但皇帝仔就覺得大命演法好老土，而大命又覺得皇帝仔演唔到古代人嘅神韻，互相都忍咗對方好耐。單嘢鬧大咗，最終就傳到高層耳邊，但高層都唔敢插手，因為一位係老前輩，而另一位就有老竇撐腰，所以冇搵佢哋傾偈，而且為息事寧人，由得佢哋各有各演。
撰文：Jessie
本欄逢周五刊登
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。
長青網 - 一站式長者及護老者生活資訊網站