收入過千萬　曹星如同老婆福岡蒲Outlet

【蘋果日報】【爆相爆片】今年31歲嘅「神奇小子」曹星如上年11月重返擂台，不過佢仍會忙裏偷閒，孖老婆Laam去旅行遊福岡，讀者林小姐就撞到佢哋恩愛行outlet掃貨。
日前《蘋果》讀者林小姐透過「爆相爆片」，直擊曹星如夫妻拖手仔喺福岡shopping。曹星如同老婆着住黑色運動情侶裝襯白色波鞋，手上各自拎住一袋戰利品。林小姐話：「當時大概晏晝3點，喺Tosu Premium Outlets見到佢哋，佢哋已經買咗兩袋嘢，佢太太嗰袋仲裝到脹卜卜，不過就唔知佢哋行咗幾耐，見佢哋十指緊扣，行咗去一間大眾化品牌時裝店買嘢，行到3點半左右就走。」
不時感謝另一半
其實，曹星如同老婆相識9年，佢哋嘅愛情故事好浪漫，兩個因放狗認識，拍拖初期，曹星如仲未成名，戶口曾經得番幾十蚊，靠當時仲係女朋友嘅Laam賺錢支持日常開支。難怪曹星如不時喺賽事講感言時，都會感激太太照顧，尤其喺自己受傷嗰陣，太太會幫佢洗頭。呢幾年，曹星如打出名堂，贏咗唔少國際拳賽，加埋商業贊助，收入過千萬，兩夫婦可謂苦盡甘來。
長青網 - 一站式長者及護老者生活資訊網站