fb港設辦事處 主攻港台

【明報專訊】莫講係小琴咁潮嘅年輕人愛玩facebook（fb），近排成班50後、60後都蜂擁玩fb。fb噚日就宣布，喺香港開設辦事處，再度在亞洲擴展版圖，唔通fb搵香港做跳板北望神州，打造一個中國特色嘅fb，等內地同胞可以玩埋一份？

fb呢幾年都好積極喺亞洲發展業務，舊年先喺新加坡開亞洲區辦事處。小琴聽講fb，喺香港開嘅分公司，會專門負責香港及台灣嘅廣告業務，並建立本地團隊，專門幫客戶度橋做營銷。消息話，fb會唔會進軍內地，暫時都只可以答「No Comment」。雖然如此，但北亞洲區總裁梁幼莓接受彭博資訊社訪問時話，喺香港成立辦事處後，fb可以吸引有意將產品推到海外嘅內地公司，喺fb賣廣告，實行另類方式賺人仔。fb亞太區、拉丁美洲及新興市場副總裁及商務總監Blake Chandlee噚日喺香港出席活動時就話，現時fb已達到正現金流的水平，而巴西同印度新興市場嘅收入亦有增長，亦好重視亞洲市場。新興市場咁有潛力，可能進軍內地之說，並非天方夜譚。

朱克伯格密密見內地IT人

小琴噚日聽業內人士講，呢排fb創辦人朱克伯格（Mark Zuckerberg）成日同一班內地IT界猛人密密見面，大家都盛傳fb快將進軍內地。業內人士估計，fb會入鄉隨俗，開發一個中國版fb，禁止敏感言論。但諗深一層，外資互聯網企業喺過去都無咩優勢，喺香港做得出色嘅雅虎、谷歌（Google）喺內地都敵不過百度。放眼內地社交網站由人人網、開心網，同微博雄霸之下，且看fb若真係殺入神州，能否再起風雲。

報料電郵﹕piano@mingpao.com