光鮮樂富廣場 人流增兩成

【明報專訊】領匯噚日年初六喺旗下嘅樂富廣場舉行「花開富貴大團拜」，出席嘅自然唔少得領匯行政總裁王國龍，仲請嚟紅星鍾嘉欣出席。

雖然領匯成日被批評加租令租戶無啖好食，不過呢個問題可能唔會出現喺樂富廣場，因為王國龍話農曆新年期間，商場嘅人流有兩成增長，生意亦較去年暢旺咁話。樂富廣場係領匯旗下最旺嘅商場之一，記者都想知道領匯下個重點商場喺邊度，但係王國龍無理到記者就急急腳咁走咗，留低一班行家喺度望門興嘆。

話時話，樂富廣場翻新之後，真係比以前光鮮得多，除咗引入日式百貨店之外，喺上月初開幕嘅B區，仲有賣蘋果產品嘅專門店，領匯仲話要將樂富廣場打造成為九龍中最具吸引力嘅購物熱點喎。不過小琴就覺得，樂富廣場由一個屋村商場，變身做一個潮流購物點，對區內嘅居民嚟講都可能係一個幾大嘅衝擊。