港交所數據中心 靜雞雞動土

【明報專訊】港交所（0388）噚日初六喺將軍澳工業邨，為新一代數據中心舉行動土儀式。出席嘉賓陣容鼎盛，包括﹕財經事務及庫務局長陳家強、港交所主席夏佳理、港交所行政總裁李小加，同埋證監會行政總裁韋奕禮。但就冇安排傳媒採訪，小琴睇過通勝，噚日宜動土、裝修、開幕啟市，睇嚟都好啱傳媒嚟熱鬧吓，但港交所同政府最後只係發布活動相片同新聞稿。

冇安排採訪 事後發新聞稿

前日初五開市時，陳局長、夏佳理同李小加都有出席開市活動，同埋四出派利市。唯獨未見韋奕禮，佢今年中卸任，9月會去英國履任新工作。小琴都好想見多佢幾面，可惜噚日就緣慳一面了。

講番呢個數據中心，港交所打算喺2012年第4季，將證券市場嘅主要數據中心搬入將軍澳。港交所同時會提升交易系統，處理量提高10倍，每秒處理3萬個買賣盤，平均買賣盤處理時延速度縮減為9毫秒，預計今年底前完成升級工作。