家屬路祭　車長遺孀嚎哭

【蘋果日報】西九龍快速公路奪命車禍中，慘死城巴車長的家屬及同事等一行約30人，昨返回現場冒雨路祭。其間死者妻子傷心欲絕，不斷呼喚丈夫，一度蹲身痛哭，癱軟地上，要親友攙扶離開。
「老公返嚟喇　我煲咗湯」
昨晨11時許，59歲慘死車長蘇國偉的家屬、同事及城巴代表等，由一輛雙層城巴接載到車禍現場進行路祭，警方封閉西九龍公路左邊慢線及路肩，供死者家屬舉行儀式。眾人將生果、叉燒飯和烏龍茶等祭品放在地上，冒着微風細雨，由道士帶領燒香拜祭；現場亦掛起死者一件城巴車長制服用作招魂。
路祭期間，蘇妻傷心激動，對丈夫遺下三名子女孤苦無依，更是嚎哭不止，不斷叫喊：「老公，返嚟喇，我煲咗湯呀！你做咩唔返嚟飲？細路好掛住你呀！你要過得好好哋呀！想去旅行就去旅行！」她一度蹲身痛哭，癱軟地上，要親友攙扶安慰。
家屬直言事件中，西隧應負上責任。死者同事亦眼泛淚光，呼叫：「阿蘇，落更啦！」各人逗留約45分鐘後離開。
■記者翁鈺輝
長青網 - 一站式長者及護老者生活資訊網站