金手指：人行印鈔實驗有結果

【蘋果日報】
呢幾日，好難預測股市走勢，因為除咗好多因素同時出現外，仲要每個因素嘅影響都難測。
上周歐央行又玩印鈔，歐洲銀行股應聲下跌。睇啲陀地及老外分析員，都話印鈔市都跌，係印鈔等於個經濟唔好喎。老實，以前印鈔，經濟都係唔好，不過啲嘢都可以炒到上天花板。今次最令老練炒家頭痕，就係對上十年，萬試萬靈嘅炒法，「印鈔即升」，居然失靈。
仲有，一月人行都玩印鈔，搞到大陸股市㷫烚烚。不過，大陸啲經濟數據，例如新車銷售、PMI、用電量等等，喺二月都係大大哋鑊。一月印鈔時，李克強總理都再三強調唔要「大水漫灌」，即係要經濟受惠，不過唔要炒炒賣賣。老實，大陸經濟經過多年扭曲，各行各業都產能大幅過剩。
啲企業借錢，如果真係做生意，就一定係因佢負債太重，要做生意跑現金流去吊命。啲資產負債表健全嘅公司，一定唔會喺全行都要蝕錢嘅情況同你做生意，只會借你人行印嘅錢去炒賣，即印鈔不但鼓勵炒賣，仲要拖慢淘汰「喪屍企業」嘅速度。
我相信，李克強總理一定早知會咁，不過習總身邊一定係有啲擦鞋仔軍師，話印鈔好。李總理就話：「ok，就做個印鈔實驗。」依家啲結果入來了。咁你仲印唔印？唔印，港股會點？不過如果喺習總心中，擦鞋仔贏李總理，港股又會點？好難預測呀。
孫柏文
獨立股評人
http://fb.com/shuen
本欄逢周二刊出資料來源：蘋果日報2019年3月12日

長青網 - 一站式長者及護老者生活資訊網站