新聞類別
財經
詳情#
【明報專訊】前日無綫公布，八達通前行政總裁陳碧鏵擔任電視廣播（0511）總經理，負責國際業務。小琴嘅手足整咗個電視廣播架構圖，顯示管理層最新嘅人手安排，有無綫管理層告知，主席邵逸夫（六叔）之下就係副主席太太方逸華（六嬸），梁乃鵬就係副行政主席，咁講都照計好合理。原來弄出個美麗誤會，電視廣播噚日特別鄭重澄清，正確版本應該係，副行政主席梁乃鵬是無綫第二把交椅，方逸華係第三把交椅。
幾年前「六叔」邵逸夫轉咗做非執行主席，好多大事似乎由六嬸方逸華作決定，例如﹕陳志雲復職總經理，甚至招攬陳碧鏵入TVB，都有傳聞話係六嬸話事，於是外界一直以為六嬸有話事權，而梁乃鵬就退居幕後。原來真正嘅第二把交椅係梁乃鵬，咁六嬸嘅決定，唔知，使唔使經梁乃鵬拍板至得呢？
睇番電視廣播以往嘅通告，都唔係咁容易睇出呢個人事架構。通告寫邵逸夫爵士做主席，方逸華係副主席及董事總經理，當中仲話明邵逸夫爵士之替任董事，正正就係六嬸。
梁乃鵬先係「阿二」
所以，小琴都誤會咗六叔、六嬸一家人，順理成章係一主一副，搞出呢個誤會，真係要同梁副主席講聲Sorry。咁小琴都清楚晒，下次電視廣播有新發展，唔好只係顧住追問六嬸，都要追問埋梁副主席至得。而方逸華之下，就係集團總經理李寶安，以及三位總經理﹕陳碧鏵、陳志雲、鄭善強。
報料電郵﹕piano@mingpao.com
回應 (0)
