人物專訪：新股女王：做刁iBanker好講義氣

【蘋果日報】有「新股女王」之稱的卓佳香港商務部董事總經理鍾絳虹，與iBanker打交道逾廿年，鍾絳虹坦言，金融圈人情紙薄是一定，但「做刁（deal）嘅iBanker好講義氣！」。因為有義氣，才能捱過新股上市期間無數的困難，獲得客戶的信任，繼而有下一單生意。
記者：陳雪蕾
她多年來參與至少600隻新股上市，投行及律師為她冠以「IPO Queen（新股女王）」。「呢個世界一定有兩種人，一種係好講義氣，做人做生意都係講個信字。」明明已完成自己工作，仍願意捱夜「執手尾」，「好多時係睇你幫唔幫佢諗，肯唔肯同佢揹，要喺人情同道理之間取捨。」彼此間信任就是這樣，一點一點建立起來。 因此鍾絳虹深信無義氣的人是做不到「刁」。
至於另一種人，就選擇比較保守嘅做法，觀察多時後才決定，「人始終係照顧自己利益行先，你唔可以怪人，係咪？」
轉投卓佳有新感受
鍾絳虹曾說過，投行界合作時的友誼只是過眼雲煙，但去年她毅然離開工作了四分一世紀的中央證券登記，轉投卓佳，令她有新感受，「有啲banker都好支持，仲會同個客推薦我，話我真係信得過……始終唔同公司、唔同行業，做乜要幫你出聲？但原來真係會有人撐㗎。」去年聖誕節，卓佳為鍾絳虹舉辦聖誕派對，多位合作多時的iBanker都賞面出席，順道恭賀她事業更上一層樓。
鍾絳虹畢業後第一份工作是在英資怡和擔任公司秘書助理，後來跳槽到中央證券工作，直至去年才轉工到卓佳，在金融界裏算是罕見。她坦言，當年轉投中央證券，只是打算做兩年，但做下去有成功感，一晃眼就25年。她認為，要成功「做好你份工」，除了義氣和信任，知識亦很重要，「若你做事覺得唔成功、唔開心，你梗係要轉工啦！但若是從事專門行業，其實做得唔夠耐係浸唔夠，浸唔夠就唔會有足夠嘅經驗同知識。停留太短時間，唔夠你去建立你嘅信字，亦冇咗融會貫通嘅能力。」
長青網 - 一站式長者及護老者生活資訊網站