遇良心業主　30年餅店守得住

【蘋果日報】「3蚊一個蛋撻、3個半一個菠蘿包，咁多年冇乜點加價，做開街坊生意。」好鄰居餅店在佐敦文蔚街開業超過30年，老闆陳先生1994年接手經營，每日朝6晚8，一做就25年，見證區內變遷。「當時呢度係碼頭，人比較多啲，工廠年代，（工人）菠蘿包、雞尾包成盤買走，以前好多人，條街好旺㗎。」
同區狂加租逼走小店
300多呎餅店，是附近街坊、學生聚腳地，「買完麵包，佢哋得閒會傾多兩句，打吓牙骹。」感情一點一滴累積，與街坊變成朋友，「有啲由細睇到佢大，睇住佢細個揹住個書包幫我買麵包，結咗婚、搬走咗就拖住小朋友返嚟幫襯。」
西九龍一帶多年來大興土木，繼柯士甸站、再有高鐵西九龍站，不少業主看好旅客會帶來商機，「由起柯士甸站開通前已經炒到飛起（加租），（部份業主）咪係咁加價，有啲加成倍、有啲加百分之五十，好多（租客）被加得太厲害都唔做， 依家都冇乜幾間剩低，大部份都因為加租走咗。依家都有好多吉舖，有啲空咗年幾兩年。」
餅店幸好遇上良心業主，「啱啱續租業主冇乜點加租，（良心業主）依家都好難搵」。他又稱，高鐵西九龍站通車後，文蔚街一帶人流沒有增加，「（旅客）去都去咗尖沙嘴、寶靈街、佐敦道……嚟唔到呢度，因為呢度冇商場，啲人唔會嚟呢度買嘢。」
他又稱，該處「多咗一、兩間藥房，我諗大部份人都係睇好（高鐵通車），但冇諗過係冇人流。」
■記者譚靜雯
長青網 - 一站式長者及護老者生活資訊網站