內地人只掃奶粉 黎大鈞嘆電訊商冇着數

【明報專訊】香港寸金呎土，人人皆知。數碼通（0315）行政總裁黎大鈞就講，最令佢估唔到係，就連上水舖位都大幅加租。黎大鈞話，大批內地人近年湧去上水掃日用品，於是租金就不斷上升。佢感嘆話，內地人通常係掃奶粉，上水零售商就話受惠，佢地電訊商根本無咩着數，但加租就一定有份。黎大鈞仲講，公司有陣時都想係旺區租間靚舖，但係好多時不單止唔輪到你揀，慢幾秒就連舖都畀人租埋。

黎大鈞講，依家嘅租金係咁加，有陣時有成幾十巴仙加幅，但生意額又唔係追住租金升幅。小琴聽講，原來黎生一早已經洞悉到租金有增無減，前幾年都有諗過要買舖，仲諮詢過母公司新地（0016）代理執行董事雷霆，但對方當時又無表示咩意見，所以黎大鈞諗諗吓，都係無去馬。到最近，黎大鈞撞到雷霆，點知對方問佢點解當時唔買舖呀，依家升左咁多喇，黎生當時乜反應？大家估吓啦。