金融界憂「中伏」　被迫唱好大陸

【蘋果日報】港府將《逃犯條例》修訂提上立法會硬闖關，要北上營商的金融從業員擔心中伏。本身為業界中人的「思言財雋」發言人陳漢輝指，他日推銷投資產品，隨時被內地指違法，寒蟬效應下，金融分析師或評級機構，或憂慮被指洩露敏感機密資料，被迫唱好中國，難以再寫中肯報告，更甚是打開缺口後，香港法制不再是外資信心保證，外商勢將重心轉移他處，「香港（屆時）仲有乜價值呢？」
陳漢輝接受《蘋果》訪問時指，金融從業員包括私人投資服務或投資產品推廣員以及銀行界，經常往返內地接洽生意，礙於牌照制度一般只會「離岸」推廣，即在內地認識客戶後，返港後才推銷產品，一切工作依香港標準，但修例會突破中港司法區隔，「喺香港推廣一啲嘢（投資產品），中國政府唔容許，認為呢啲產品係唔適合或者犯法」，日後隨時被引渡返內地，「就算你個人喺香港，所做嘅嘢喺香港發生，佢都可以有權認為你做嘅嘢喺大陸係犯法，引渡你返去」。
外資隨時撤往新加坡
他擔心修例產生寒蟬效應，與內地做生意會被迫唱好內地公司，他以金融分析師或信貸評級機構為例，指評級資料很多時涉及敏感資料，隨時被中國政府以洩露機密為由，指控違法要求引渡，「好多嘢你係唔敢再寫，或者非常偏頗，變咗評級機構、分析師嘅工作好難再做落去，自我審查會變得好嚴重，變咗出嚟嘅報告唔會再中肯」。陳指在內地做生意有不少潛規則，亦要與官員打交道，「食飯飲酒各方面一定有」，即使內地打貪，但風氣未全然更改，金融從業員倘繼續這些做法，隨時違法而被引渡，更重要是在內地受審能否獲公平審訊至今仍是問號，他指曾有業界人士在內地犯法被拘留半年，「完全冇審訊冇（接觸）律師」。
陳聽聞有外資密切留意事態發展，並已作內部部署，「但佢哋唔會向外公佈，向外公佈嗰一刻已經冇得救」，若國際投資者另擇亞太區總部，料會是香港主要競爭對手新加坡，「就算你話佢（新加坡）唔太民主都好，但佢係主權獨立國家、有完善法制，喺商業上係做得好好，唔會太畀壓力商界」。
■記者梁穎妍
長青網 - 一站式長者及護老者生活資訊網站