陳健民：不容監獄摧毀我們

【蘋果日報】【佔中九子案】「我不斷鼓勵自己要講，就算係坐監，我都唔會俾呢個監獄摧毀我哋。」陳健民在佔中案開審前已經做好最壞打算，即使判監也要面對。曾經有外國機構建議他不要回港受審但他拒絕，「政府用呢啲方法（監禁）想摧毀運動，如果我哋冇俾佢摧毀到，我好希望鼓勵到身邊嘅人繼續落去」。
陳健民相信市民憑獨立意志走出來佔領，一直不服被控煽惑他人煽惑公眾妨擾。況且三子凌晨宣佈提早佔中後，人潮幾乎全部散去，「我哋係沮喪到不得了，你見到場裏面剩返都唔知有冇300人、500人，由幾萬人走到幾百人，你諗吓幾沮喪。咁多年我仲以為自己都幾smart，冇理由做咁錯決定，而且決定又唔係單獨我哋做。點解會錯得咁交關？」
他用「好悲慘」形容當時情景，「叫啲人過去嗰個位（留守）、過去呢個位，其實係咁多人，去得嗰度呢度就冇人，根本你係冇晒米去煮餸，所以佢（鍾耀華）話好多人嚟緊金鐘，我覺得『夜行人吹哨子』，自己喺度為自己打氣」。
「究竟會唔會走返去前面？呢啲唔輪到你自己決定，有時要睇時勢、係咪有咁嘅政治機會。」
當控方在法庭播放市民突破警方防線，佔領夏愨道片段，陳健民還是第一次看畢整個過程，他指衝出馬路的臉孔都是普通市民，佔中三子的角色是inspire（啟發），而不是incite（煽動），「我對煽動罪零舍反感，佢係假設緊人冇獨立思維，資訊係封閉。今日你講緊佔中嘅野，反佔中仲多渠道喺社會流通緊，主流媒體呀等等。嗰啲人唔係得一個資訊，點樣俾你洗腦？」
教陳健民最印象深刻的是審訊完結那天，一名在親建制傳媒機構工作的記者等所有人離開後走近與他握手，「我好明白佢眼神意思，每個人盡咗佢嘅力量，盡量去報道真相，但可能個編輯唔知點樣去改佢」。審訊期間佔中九子同坐被告欄，中午一起吃陳健民太太準備的便當。環顧眾人，白髮漸生的陳健民特別感慨。傘運過了四年多，年輕人的改變比他更大，鍾耀華滿面滄桑，岑敖暉身體消瘦，還有很深的眼袋，「雨傘對新一代影響好深、挫折好深，你睇見鍾耀華外表變化已經知道。我仲啱啱講我哋三子有變化，我覺得都唔及年輕人嗰種變化」。
陳健民受訪時未為自身處境憂愁，反而擔心同案被告戴耀廷和邵家臻的大學教席，「唉，後面呀戴耀廷要面對嘅嘢……我就輕身上路，我好輕鬆，我早走八個月（退休）其實冇乜嘢，戴耀廷仲年輕。阿戴之後，我諗邵家臻比較受壓力，好似想郁佢（教席），唔係立法會議員之後點呢？」
佔領結束後很多人面對審訊，陳健民說，只是今次輪到佔中九子，情況好比單車比賽遇上逆風，大家輪流上前頂着，「其實都係頂住風，我哋唔好跌低咪OK囉，其他人唞一唞，思考吓點走落去」。他未來在社運的位置或稍為後退，「究竟會唔會走返去前面？呢啲唔輪到你自己決定，有時要睇時勢、係咪有咁嘅政治機會。從我自己個人同屋企角度出發，我就希望唔離開呢個運動，但係企後少少，更多年輕力壯可以走前少少」。
■記者潘柏林
長青網 - 一站式長者及護老者生活資訊網站