AIA想「晨早」發業績

【明報專訊】即將踏入上市公司業績高峰期，除咗一眾藍薵股的「成績表」備受注目之外，喺去年10月底挾新股「集資王」之名在港掛牌嘅友邦保險（1299，AIA），由於散戶人數超過20萬人，所以其上市後嘅首份業績亦教好多小股東引頸翹望。

AIA除咗要落力做靚盤數之餘，小琴收到風，佢哋仲矢志要喺業績公布安排上做個好榜樣。一般上市公司公布業績，都會揀喺中午休市或下午4點收市後進行，但據知情人士透露，打算喺本月25日發布業績嘅AIA，將會喺當日早上7點幾就將業績上載至聯交所，等大家喺開市前「先睹為快」。

雖然未必個個小股東都習慣大清早就查看聯交所通告，但對於AIA嘅安排，小琴就覺得值得一讚，起碼可以畀一眾財經記者，有足夠嘅時間刨熟往往長達過百頁紙嘅業績內容，等到舉行記者會時可以一針見血地向管理層作出提問，咁間公司盤數好與壞就無所遁形啦。