【金手指】樓市最後一隻熊投降

【蘋果日報】
早幾日，睇本報報道，孫柏文心中香港樓市最後一隻熊，湯文亮也投降。話到今年年尾，樓市升一成。
由2008年至今，我一路堅決相信樓市嘅升幅，最終推動引擎係美帝同強國嘅貨幣政策。首先，美帝雖然話加息已完。不過量化收縮都仲係不斷進行中。特朗普同聯儲局睇落似達成共識，就係息就唔加，不過錢可繼續縮。所以就算聯儲局官方嘅短息率冇郁過，各地包括香港同美帝嘅銀行同業拆息不斷升。連宇宙最強國嘅四大銀行，手上嘅美元都買少見少。呢個係我睇淡嘅主因。
不過，港樓確實有升。我覺得最主要理由，係大陸水源斷絕，啲錢最後離開嘅會係香港。冇錯，大陸確實係重拾印鈔之路，不過純粹睇全球資產走勢，大陸打資金流走嘅力度亦加大。可能香港到今日都仲係易走來啲。而睇數據都睇唔到，因香港有好多孟晚舟呢隻「香港人」，佢哋都係揸身份證買樓。
而呢轉香港樓市，都係之前已落注嘅人，同嗰啲打死都唔買嘅人，繼續原有睇法。噚日張宗永話要「忘掉獅子山精神」。我話唔係忘記，而係要將焦點轉一轉。「獅子山精神」唔好再睇為幾百萬人聚集喺獅子山腳，赤手空拳製世界級經濟奇蹟。而係嗰幾百萬人有一日，對自己住緊嘅環境不滿，攀山涉水，冒死都走。大家係時候重新諗咩叫「獅子山精神」。
孫柏文
獨立股評人
http://fb.com/shuen
本欄逢周二刊出
長青網 - 一站式長者及護老者生活資訊網站