【智取大市】最後短炒時辰到

【蘋果日報】望一望人民幣滙價走勢，就會發現近排似有轉升為跌嘅迹象。問題有兩個，第一，人民幣醞釀轉升為跌，假若跌勢加快，係咪對港股必然帶嚟負面衝擊；第二，過往人民幣醞釀跌勢嘅時候，會唔會市場早已聞到味而跌定先？
關於第一個問題，過往5年計，人民幣呢類醞釀跌勢而及後跌勢加劇嘅走勢，發生喺2015年第四季，2016年3、4月，同2018年5月份。其中只有2016年3、4月間，港股只出現一下震倉，然後恒指繼續升；其餘兩次恒指都出現較大跌勢。
關於第二個問題，恒指跌市竟然是相對滯後於人幣轉弱走勢，如果睇住人民幣開始走弱而減持，仲會走得切。
恒指近日有破旗上升準備破頂之勢，應跌不跌，由友邦（1299）、滙控（005）、恒生（011）、領展（823）等高息或高長期回報大價股領軍上升，如果再由騰訊（700）、本地地產股、內房股接多一下力破頂後，面對3萬點至31500點係舊年2月至6月嘅蟹貨區，配合人幣轉弱嘅話，升市可能要唞唞。
始終一日未到頂，還有短炒一轉機會，短炒戰友仍可留意三大中資航空股同康希諾生物（6185）呢類醞釀回升嘅股份。
晉佳
http://fb.com/advanceguy1
本欄逢周一、三、五刊出
長青網 - 一站式長者及護老者生活資訊網站