開心見誠：唔想瞓覺症

【蘋果日報】「點解你仲係瞓得唔好呀？啲唔開心都無晒㗎喇喎，你有無跟我上次教你嘅方法乖乖哋早啲去瞓覺呀？」覆診時醫生問。


「醫生，我覺得我患咗『唔想瞓覺症』，你應該研究一下呢個問題，我相信喺香港好普遍！」T回答說。


「咩『唔想瞓覺症』話？」

「其實，我都知道要瞓㗎喇，不過，無論我隻眼有幾攰，有幾想跌落嚟，我都好想追埋嗰段新聞，不過追完段新聞，又想追另一段，一路追落去，於是咪夜咗瞓囉，但過咗眼瞓嗰個位，個人就好精神，跟住就瞓唔着喇……其實我都知道我唔啱㗎，啲新聞無乜緊要嘅，同埋睇極都睇唔完，我個女玩手機唔瞓嘅時候，我都係咁同佢講㗎，不過到我自己嘅時候我又做唔到……」T笑着回答。


「其實你唔係患咗乜嘢『唔想瞓覺症』，係你任性之嘛。」醫生忍不住說。


「醫生，你點知㗎，我噚晚都係咁諗，我都係有啲任性嘅……」

「你係孻女嚟嘅咩？」醫生問。


「唔係，我係大女嚟㗎，不過，我阿爸阿媽好錫我哋，三個都咁錫！」T回答說。


「咁你係咪俾爸爸媽媽縱壞晒啊？係咪乜嘢家務都唔識做，唔識煮飯㗎？」醫生打趣說。


「我識煮飯㗎，不過煮餸嘅時候成日煮燶之嘛！」T第一時間回答道。


「咁你即係唔識煮囉，你識『煲飯』，不過就唔識煮餸，係咪咁嘅意思呀！」聽了T的答案，醫生忍不住笑起來，T自己也卡卡大笑。


雖然醫學上並沒有甚麼「唔想瞓覺症」，不過T也說得沒錯，相信，很多人都曾經試過睡前玩手機、玩電腦，玩到不願意睡，錯過了最眼瞓的時間，之後瞓不着，這個情況多數是偶爾出現，但對於小部份人來說，可能是每晚睡前的經歷，在沒有智能手機、平板電腦之前，在床上只可以看書、聽音樂，最多是看電視，除非書的內容或電視的節目很吸引，不然的話，看着看着，睡魔來襲，就自然睡着。


自有了新科技後，在床上的資訊和娛樂就精采多了，如果抵受不住誘惑，睡眠的規律很容易受擾亂，T不需要上班，沒有早起的必要，所以，醫生擔心，要好一段時間，T才能夠將「唔想瞓覺症」這個壞習慣糾正過來。


「醫生，你唔使擔心，我已經報咗朝早嘅興趣班，同啲朋友一齊去上堂，到時候朝早要早起，自然夜晚唔會咁任性㗎喇！」T充滿信心地回答。


http://fb.me/1486drlee

李德誠　精神科專科醫生

想輕輕鬆鬆健康啲，記住留意健康蘋台

http://health.appledaily.com.hk/