國泰睇化「因航」稱號

【蘋果日報】【中環在線】國泰（293）邀得本地樂隊Supper Moment及香港傑出單車運動員李慧詩，拍攝短片宣傳公司新品牌口號「志在飛躍Move Beyond」。顧客及商務總裁盧家培（Paul）噚日同傳媒分享李慧詩嘅故事時，突然哽咽，仲眼睛通紅，應該係諗起國泰過去高低起跌一時感觸。
Paul話，國泰過去幾年都好辛苦，都有低潮，但公司跟李慧詩所講嘅一樣，「贏定輸都係噚日嘅事」，最重要嘅係，公司有決心將Move Beyond理念實踐，喺機隊、餐飲、預訂配套改善，提升乘客服務體驗。
被問到今次重塑品牌係咪想「搣甩」外界給予公司嘅稱號──「因航」，佢話面對以前嘅教訓，佢哋唔會當睇唔到，公司已去到自嘲嘅境界，有時都會自稱「因航」開下玩笑，仲好輕鬆咁話：「有咩所謂，你講渣嘛，每個人都有花名」，睇嚟已經睇化晒。
李華華
LiWaWa@AppleDaily.com
長青網 - 一站式長者及護老者生活資訊網站