7年前接手家族生意　改革管理 幸福醫藥63歲CEO仍有火　為衝出香港打拼

【蘋果日報】【財經專訪】一句「幸福要走多步」，帶領幸福醫藥走到第65個年頭。現年63歲的幸福醫藥CEO黎元輝可謂同公司一起成長，「小時候，朋友有得放暑假周圍去玩，我嘅暑假就係留喺工廠幫手，所以不嬲有個心志喺公司裏面。」與老員工關係好，笑言彼此「睇住大」，因此希望傳承爸爸辛苦建立的本土品牌。
記者：李海澄
黎元輝形容自己是發夢者，「我希望有一間完美嘅廠、希望幸福醫藥跨出香港，衝出亞洲……」夢易行難，即使年逾花甲，談起夢想卻仍然雙目有火，「冇夢想冇將來，好多嘢都要有夢想先！」
作風低調的黎元輝，近年接受訪問一隻手數得完。七年前才正式接手家族生意，對當時56歲的黎元輝而言卻不覺遲，「若公司未有咁嘅生意額、發展空間，就算我接手都係坐喺度。」從前的家庭式管治只有一把聲，獨權管治下，公司管理層架構同樣簡單，只有一個總經理及三個部門經理。黎元輝認為時代改變，公司亦要多元化發展，遂成立董事局，「唔可以只靠自己，要靠團隊。現在我哋有財務、銷售分析，雖然唔係水晶球，但都能估算出重要數據。」
拓長者及長期病患產品
1954年開業的幸福醫藥，過往主要售賣成藥（OTC medicine），產品例如王牌的幸福傷風素，均可於有銷售藥牌的零售店購買，但黎元輝表示接手後希望擴大消費群，「我哋會由藥品，轉變成消費品，涉足醫生用藥。」原本品牌主要針對10歲至50歲人士，日後將會包攬所有年齡層，從0歲至老人的保健產品及長期病患者藥品，例如高血壓、糖尿病、膽固醇等。
幸福醫藥工廠現設於柴灣，到2020年尾將會搬到32萬方呎的元朗新廠房，屆時新廠房的產能是現時廠房的的四倍，除了原有的產品外，將能生產醫生用藥，以及研製沖劑、水劑等。公司中高層近日就此開第9次策略性會議，討論搬廠前期工夫。
「管理公司最難都係互信，全公司約300人，如果冇統一聲韻，隨時生產部講潮州話，人事部講台山話，同事好難跟，所以唔希望走音變化。」他提到，以往老員工習慣有指示才動手，但現在其管治思想是，「員工都係老闆之一，有企業家精神，即使我有指示，都要佢哋再構思點樣實踐，有困難一齊再傾。」
黎元輝當年在美國修讀商業管理學位後回港，做過銀行櫃枱職員，及後加入公司，擔任市場發展經理，以顧問角色協助父親。始終「一山難藏二虎」，直到1992年，幸福醫藥拿到本港首個批文，成功進軍內地，黎元輝就被指派專責國內市場。
攻內地體會飲酒應酬文化
「開拓大陸市場就領略到自己能力，亦發現人際關係好重要，佢哋嘅文化係飲酒應酬，成日話『研究』，其實就係普通話嘅『煙酒』。」他笑言，幸好沒有被灌酒，但從交際中體會到人與人之間最重要是合作和信任。
從家族管理變成企業管理，人才要妥善分配，於是黎元輝成立人力資源部門。而幸福醫藥雖為港人所熟知，但暫未決定上市，「唔上市咪仲好，一家人閂埋門拆掂佢，但上市又要俾小股東問，唔好啦！」
長青網 - 一站式長者及護老者生活資訊網站